ಗ್ರಹಗಳು.

ಆಕಾಶ, ಸೂರ್ಯ, ಚಂದ್ರ ನಕ್ಷತ್ರಗಳ ಬಗ್ಗೆ ಬಹಳ ಕುತೂಹಲ ಇದ್ದ ಧ್ರುವನಿಗೆ
ಖಗೋಳದ ಬಗೆಗಿನ ಒಂದು ಪುಸ್ತಕ ತಂದು ಕೊಟ್ಟೆ.
ಪ್ರತಿ ದಿನ ಒಂದು ಪುಸ್ತಕ ಓದಿ ಹೇಳುವುದು ರೂಢಿ.
ಈ ಪುಸ್ತಕ ಬಂದ ಮೇಲೆ ಅದರ ಬಗ್ಗೆ ಪ್ರತಿ ದಿನ ಪ್ರಶ್ನೆಗಳು.
ಅದಕ್ಕೆ ನಮ್ಮ ಉತ್ತರ.
ಅದರಲ್ಲಿ ಗ್ರಹಗಳ ಚಿತ್ರ ಮತ್ತು ಹೆಸರುಗಳು ಇದ್ದದ್ದನ್ನು ಓದಿ ಹೇಳ್ತಾ ಇದ್ದೆ.
೨ ಸಲ ಹೇಳಿದ ನಂತರ ಮೂರನೇ ಸಲ ಅವನೇ ಹೇಳತೊಡಗಿದ.
ಹೇಳುವಾಗ ನಾನೊಂದು ತಪ್ಪು ಮಾಡಿದ್ದೆ.
ಪುಸ್ಥಕದಲ್ಲಿತ್ತು, ೯ ಗ್ರಹಗಳೆಂದು. ಪ್ಲುಟೊ ಹೆಸರು ಕೂಡ ಇತ್ತು. ಅದನ್ನ ಹಾಗೆ ಹೇಳಿದ್ದೆ.
ಆದರೆ ಈಗ ಗ್ರಹಗಳು ೮ ಮಾತ್ರ. ಪ್ಲುಟೊ ಲೆಕ್ಕದಿಂದ ಹೊರಗೆ ಇರುವುದು ಮರೆತೇ ಹೋಗಿತ್ತು.
ಮರುದಿವಸ ನೆನಪಾಗಿ ಧ್ರುವ ನ ಬಳಿ ಹೇಳಿದೆ, ಪ್ಲುಟೊ ಗ್ರಹ ಅಲ್ಲ. ೯ಗ್ರಹ ಅಲ್ಲ, ೮ ಗ್ರಹಗಳಷ್ಟೇ ಇರುವುದು.

ಆದರೆ ಗ್ರಹಗಳ ಹೆಸರು ಹೇಳುವಾಗ ಧ್ರುವ ನಿಗೆ ಕೊನೆಯ ಪ್ಲುಟೊ ಬಿಡಲು ಮನಸ್ಸೇ ಇಲ್ಲ.
ನೆಪ್ಚೂನ್ ಹೇಳಿದ ನಂತರ ಪ್ರತಿ ಸಲ ಕೇಳ್ತಾನೆ, ಅಮ್ಮ, ಪ್ಲುಟೊ ಹೇಳಲಾ?
ಕೊನೆಗೆ ಗೊತ್ತಾಯ್ತು, ಪ್ಲುಟೊ ಅಂದ್ರೆ ಯಾಕಷ್ಟು ಇಷ್ಟ ಅಂತ...
ಯಾಕಂದ್ರೆ, ಮಿಕ್ಕಿ ಮೌಸ್ ಜೊತೆಗೆ ಒಂದು ನಾಯಿ ಇದೆ, ಅದರ ಹೆಸರು ಪ್ಲುಟೊ.
ಮಿಕ್ಕಿ ಮೌಸ್, ಮತ್ತು ಪ್ಲುಟೊ ಅಂದ್ರೆ ಧ್ರುವ ನಿಗೆ ಬಹಳ ಇಷ್ಟ.

ಪ್ರಶ್ನೆ

ಮಕ್ಕಳ ಮನಸ್ಸಲ್ಲಿ ಮೂಡುವ ಕುತೂಹಲ ಎಷ್ಟಿರುತ್ತದೆ ಅನ್ನುವುದಕ್ಕೆ ನಾನು ಒಂದು ವಿಷಯದ ಬಗ್ಗೆ ಹೇಳುವಾಗ ಧ್ರುವನಲ್ಲಿ ಮೂಡಿದ ಪ್ರಶ್ನೆ ಸಾಕ್ಷಿ.
ಗ್ರಹಗಳ ಬಗ್ಗೆ, ಸೂರ್ಯ ಗ್ರಹಣದ ಬಗ್ಗೆ ಚಂದ್ರಗ್ರಹಣದ ಬಗ್ಗೆ ಧ್ರುವ ಮತ್ತು ನಾನು ಮಾತನಾಡುತ್ತ ಇರುವಾಗ ಧ್ರುವ ಕೇಳಿದ,
ಅಮ್ಮ ಸೂರ್ಯಗ್ರಹಣಕ್ಕೆ ಇಂಗ್ಲಿಷ್ ನಲ್ಲಿ ಏನು ಹೇಳ್ತಾರೆ? ನಾನು ಹೇಳಿದೆ, "solar eclipse".
"ಚಂದ್ರ ಗ್ರಹಣಕ್ಕೆ ??" ಕೂಡಲೇ ಇನ್ನೊಂದು ಪ್ರಶ್ನೆ,
"lunar eclipse" ಉತ್ತರ ಹೇಳಿದೆ.
ಕೂಡಲೇ ಅವನಿಂದ ಇನ್ನೊದು ಪ್ರಶ್ನೆ , "ಮತ್ತೆ ಭೂಮಿ ಗ್ರಹಣಕ್ಕೆ?"
ಸೂರ್ಯ ಗ್ರಹಣ ಮತ್ತು ಚಂದ್ರ ಗ್ರಹಣ ಮಾತ್ರ ಆಗಲು ಸಾಧ್ಯ ಎನ್ನುವುದನ್ನ ವಿವರಿಸಿ ಹೇಳಿದ ಮೇಲೆ ಆ ಕುತೂಹಲ ಕಡಿಮೆ ಆಯಿತು.


ಇನ್ನೊಂದು ಸಂದರ್ಭ : ಊಟ ಮಾಡಿದ ನಂತರ ಮೊಸರನ್ನು ಫ್ರಿಡ್ಜ್ ನಲ್ಲಿ ಇಡುವಾಗ ಧ್ರುವನ ಪ್ರಶ್ನೆ ಬಂತು.
ಅಮ್ಮ, ಮೊಸರು ಯಾಕೆ ಫ್ರಿಡ್ಜ್ ನಲ್ಲಿ ಇಡ್ತಾ ಇದ್ದಿ?
ಪ್ರ : ಪುಟ್ಟ, ಮೊಸರು ಫ್ರಿಡ್ಜ್ ಲ್ಲಿ ಇಟ್ರೆ ಹುಳಿ ಆಗುದಿಲ್ಲ.
ಉ :ಫ್ರಿಡ್ಜ್ ಲ್ಲಿ ಇಟ್ಟರೆ ಯಾಕೆ ಹುಳಿ ಆಗಲ್ಲ?
ಪ್ರ :ಫ್ರಿಡ್ಜ್ ಲ್ಲಿ ಕಡಿಮೆ ಉಷ್ಣತೆ ಇರುವ ಕಾರಣ ಹುಳಿ ಆಗಲ್ಲ.
ಉ :ಯಾಕೆ ಕಡಿಮೆ ಉಷ್ಣತೆ ಇದೆ ಫ್ರಿಡ್ಜ್ ನಲ್ಲಿ?

ಸರಿ, ಇದಕ್ಕೆ ನಾವಿಬ್ರೂ ಸೇರಿ ಒಂದು ಪ್ರಯೋಗ ಮಾಡಿದೆವು.
ಒಂದು ಸಣ್ಣ ಪಾತ್ರೆಯಲ್ಲಿ ಸ್ವಲ್ಪ ಮೊಸರನ್ನು ತೆಗೆದು ಫ್ರಿಡ್ಜ್ ನ ಹೊರಗಿನ ವಾತಾವರಣದಲ್ಲಿ ಇಟ್ಟೆವು.
ಆ ರಾತ್ರಿ ಹೊರಗಿಟ್ಟ ಮೊಸರನ್ನು ರುಚಿ ನೋಡಲು ಕೊಟ್ಟೆ. ಫ್ರಿಡ್ಜ್ ನಲ್ಲಿರುವುದನ್ನೂ ಸ್ವಲ್ಪ ಕೊಟ್ಟೆ.
ರುಚಿ ನೋಡಿ ಹೌದು, ಹುಳಿ, ಹುಳಿ ಇಲ್ಲದ್ದು ಅಂತ ಹೇಳಿ ವ್ಯತ್ಯಾಸ ತಿಳಿದ ನಂತರ ಅವನಿಗೂ ಸಮಾಧಾನ, ನನಗೂ ಸಹ.

ನಿಜವಾದ ಬಸ್

ನಾನು, ಧ್ರುವ ಬಸ್ಸಿನಲ್ಲಿ ಪ್ರಯಾಣ ಮಾಡುತ್ತಿರುವಾಗ ಧ್ರುವ ಕೇಳಿದ "ಅಮ್ಮ, ಆ ಬಸ್ ನೋಡಿದೆಯ?" . ನಾನು ಆ ಬಸ್ಅನ್ನು ಗಮನಿಸಿರಲಿಲ್ಲ. ಧ್ರುವನಿಗೆ ಹೇಳಿದೆ, ಗಮನಿಸಲ್ಲಿಲ್ಲ ಪುಟ್ಟ, ಹೇಗಿದೆ ಅದು ?? ಅದಕ್ಕೆ ಬಸ್ ಹೇಗಿದೆ ಅಂತ ವಿವರಿಸುವುದಕ್ಕೆ ಗೊತ್ತಾಗದೆ, ಒಂದು ಕ್ಷಣ ಯೋಚಿಸಿ ಧ್ರುವ ಉತ್ತರಿಸಿದ - "ನಿಜವಾದ ಬಸ್ ಅಮ್ಮ ಅದು".

ನಾನು ಧ್ರುವ .

ಇದು ನಡೆದದ್ದು ಸಿಂಗಪುರದಲ್ಲಿ. ಧ್ರುವ ಪ್ಲೇ ಹೋಂ ಗೆ ಹೋಗುತ್ತಿದ್ದಾಗ ಅವನ ಸ್ನೇಹಿತರ ಅಮ್ಮ, ಅಜ್ಜಿಯಂದಿರು ಧ್ರುವ ನನ್ನು ನೋಡಿ "handsome boy" ಅಂತ ಹೇಳ್ತಾ ಇದ್ರು. ಇದಕ್ಕೆ ಧ್ರುವನಿಗೆ ಯಾವಾಗಲೂ ಕೋಪ, "ನಾನು handsome boy ಅಲ್ಲ, ನಾನು ಧ್ರುವ" ಎನ್ನುತ್ತಿದ್ದ.

ಇದೇ ರೀತಿಯ ಘಟನೆ ನನ್ನ ಅಕ್ಕನ ಮನೆಯಲ್ಲಿ - ಅಕ್ಕ ಧ್ರುವನನ್ನು ಮುದ್ದು ಮಾಡಿ, ನನ್ನ ಚಾಮಿ ದೇವರು (ಸ್ವಾಮಿ ದೇವರು) ಅಂತ ಹೇಳಿದಾಗ ಧ್ರುವ ಹೇಳಿದ "ನಾನು ಚಾಮಿ ದೇವರಲ್ಲ, ನಾನು ಧ್ರುವ".

ಲೆಕ್ಕ....

ಮೂರೂವರೆ ವರ್ಷದ ಮಗ ೧ ರಿಂದ ೧೦೦ ರವರೆಗೆ ಎಣಿಸುತ್ತ ಇದ್ದ. ಫಾರ್ಟಿ ಏಯ್ಟ್, ಫಾರ್ಟಿ ನೈನ್, ಫಾರ್ಟಿ ಟೆನ್......

ಇನ್ನೊಂದು ಬಾರಿ ಏಣಿಸುತ್ತ ಇದ್ದ ರೀತಿ -- ಟೆನ್, ಟ್ವೆಂಟಿ, ಥರ್ಟಿ , ಫಾರ್ಟಿ, ಫೈವ್ ಟೀ .....

ಧ್ರುವ ಅಪ್ಪನ ಆಫೀಸ್ ಗೆ ಹೋದದ್ದು....

ಸಿಂಗಾಪುರದ ಮುಸ್ತಫಾ ಶಾಪಿಂಗ್ ಮಳಿಗೆಯಲ್ಲಿ ಮಕ್ಕಳ ಆಟಿಕೆಗಳ ಜಾಗ ಬಹಳ ಇಷ್ಟ ಧ್ರುವನಿಗೆ. ಅಪ್ಪ ದಿನಂಪ್ರತಿ ಕಛೇರಿಗೆ ಹೋಗುವಾಗ "ಅಪ್ಪನ ಆಫೀಸ್ ಗೆ ಹೋಗ್ತೇನೆ" ಎನ್ನುವ ಹಠ. ಏನೇನೋ ಹೇಳಿ ಸಮಾಧಾನ ಮಾಡಿಸುತ್ತಿದ್ದೆ. ಅಪ್ಪನ ಆಫೀಸ್ ಗೆ ಹೋಗ್ಬೇಕು ಎನ್ನುವ ಹಠ ಏಕೆ ಅಂತ ಕೊನೆಗೊಂದು ದಿವಸ ಗೊತ್ತಾಯ್ತು. ಮುಸ್ತಫಾ ಆಟಿಕೆಗಳ ಜಾಗ ಅಪ್ಪನ ಕಛೇರಿ ಎನ್ನುವ ಭಾವನೆ ಧ್ರುವನಿಗೆ. ಅವನ ಉದ್ದೇಶ ಅಲ್ಲಿಗೆ ಹೋಗುವುದಿತ್ತು. ಕೊನೆಗೆ ಇದು ಅಪ್ಪನ ಆಫೀಸ್ ಅಲ್ಲ, ಅಪ್ಪನ ಆಫೀಸ್ ನಲ್ಲಿ ಇರೋದು ಕಂಪ್ಯೂಟರ್ ಮಾತ್ರ, ಆಟಿಕೆ ಇಲ್ಲ, ಅಂತ ವಿವರಿಸಿ ಅರ್ಥ ಮಾಡಿಸಿದೆವು. ಇದಾದ ನಂತರ ಯಾವತ್ತೂ ಅಪ್ಪನ ಆಫೀಸ್ ಗೆ ಹೋಗಬೇಕು ಎನ್ನುವ ಮಾತಿಲ್ಲ. ......